Þróunarsamvinnustofnun afhendir skólastofur í nýjan grunnskóla heyrnarlausra barna

31.7.2009

Ný skólabygging fyrir heyrnarlaus börn

Nýja skólabyggingin á efri myndinn en á neðri myndinni standa nokkrir heyrnarlausir nemendur fyrir framan skúrinn sem leikskólastarfsemin hófst í. Ljósmyndir: Vilhjálmur Wiium.

Þróunarsamvinnustofnun Íslands afhenti í vikunni sýsluyfirvöldum í Ohangwena-sýslu í Namibíu þrjár nýjar skólastofur í nýjan grunnskóla fyrir heyrnarlaus börn. Skólastofurnar eru þær fyrstu í Usko Nghaamwa skólanum í bænum Eenhana.

Að sögn Vilhjálms Wiium umdæmisstjóra ÞSSÍ í Namibíu hófst skólastarf þarna árið 2006 þegar nokkrir foreldrar heyrnarlausra barna settu á laggirnar leikskóla. Fyrsti kennarinn var Tresia Haiduwa en um líf hennar gerði Margrét Blöndal heimildarmynd fyrir nokkru í samstarfi við Þróunarsamvinnustofnun og Ríkisútvarpið.

“Þrátt fyrir ýmsa erfiðleika í rekstri leikskólans tóku menntamálayfirvöld í sýslunni eftir þessari starfsemi,” segir Vilhjálmur. “Þeim þótti framtakið þess virði að styðja enda er vitað að mörg heyrnarlaus börn búa í nágrenni Eenhana. Yfirvöld ákváðu að taka við rekstrinum og breyta leikskólanum í grunnskóla. Skólastarf hófst í janúar síðastliðnum og þá voru tekin inn börn í forskóla og fyrsta bekk. Verður síðan bætt við nýjum bekk árlega.”

Sýsluyfirvöld óskuðu eftir stuðningi ÞSSÍ við breytingarnar að sögn Vilhjálms. Stuðningurinn fólst í þrennu, þriggja mánaða þjálfun kennara í táknmáli, tjöldum sem notuð voru sem bráðabirgðahúsnæði og bygging skólastofanna þriggja. Byggingarframkvæmdir hófust að loknum regntímanum og skólastofurnar voru tilbúnar á mettíma. Skólinn er nefndur eftir sýslustjóra Ohangwena og hann tók hann við lyklunum að skólastofunum frá Vilhjálmi.

“Það ríkti mikil gleði í Eenhana með nýju skólastofurnar. Heimamönnum þykir með ólíkindum að ókunnugt fólk frá landi óralangt í burtu skuli veita samfélaginu stuðning af þessu tagi. ÞSSÍ var þakkað sitt framlag við hátíðlega athöfn þar sem skólabörn sýndu dansa og önnur skemmtiatriði,” segir Vilhjálmur Wiium.