Óendanleg tækifæri til þess að nýta þekkingu okkar til framfara fyrir heimsbyggðina

20.5.2010

Í nýtingu endurnýjanlegra orkugjafa felast mikil verðmæti fyrir heimsbyggðina

Ljósmynd: Gunnar Salvarsson.

„Íslendingar standa vissulega framarlega í þekkingu á nýtingu endurnýjanlegra orkulinda - einkum jarðhita. Það er hins vegar í ætt við steigurlæti þjóðrembunnar, sem varð okkur að falli, að halda að við stöndum þar framar öllum öðrum þjóðum. Vissulega er þekking okkar og reynsla af virkjun jarðhita mikil en aðrar þjóðir svo sem Japanir, Bandaríkjamenn, Nýsjálendingar og Ítalir, hafa þar einnig yfir mikilli þekkingu að búa. Tækifæri okkar til þess að nýta þekkingu okkar til framfara fyrir heimsbyggðina eru óendanleg," segir Sighvatur Björgvinsson framkvæmdastjóri Þróunarsavminnustofnunar Íslands.
 
Í tilefni af útkomu nýrrar skýrslu frá Sameinuðu þjóðunum - Energy for a Sustainable Future - sagði Ban Ki-moon framkvæmdastjóri að „bylting hreinnar orku" væri brýn fyrir ríkar þjóðir og fátækar til að draga úr gróðurhúsaloftegundum sem yllu hlýnun jarðar. Í skýrslunni kemur fram að 1.6 milljarður manna býr við rafmagnsleysi. Sighvatur var spurður að því hvernig hann sæi fyrir sér aðkomu Íslendinga að þessari grænu byltingu.
 
Sighvatur segir að það sé næsta eðlilegt að Þróunarsamvinnu-stofnun Íslands velji jarðhitann sem nýjasta vettvang verkefna sinna. „Framkvæmdir við tilraunaboranir og virkjanir eru dýrar og langt umfram fjárhagsgetu stofnunarinnar að kosta - enda eru framkvæmdir af slíku tagi hvort eð er ekki á borði veitenda þróunaraðstoðar heldur viðfangsefni fjárfesta. ÞSSÍ getur hins vegar hæglega haft milligöngu um þekkingarmiðlun og þekkingaruppbyggingu í jarðhitamálum fyrir tilverknað íslenskra sérfræðinga. Stofnunin getur og hefur aðstoðað stjórnvöld í þróunarríkjum, þar sem jarðhiti er til staðar, við grunnrannsóknir, við byggingu rannsóknarsetra og þjálfun starfsfólks bæði með þjálfun á staðnum og með kostun við nám í Jarðhitaskólanum," segir hann. 
 
Sighvatur nefnir að á örfáum árum hafi orðið gerbreyting á viðhorfum heimsins til nýtingar á jarðhita og öðrum grænum orkugjöfum. Hann segir að fyrir nokkrum árum hafi nánast enginn áhugi verið á þessum málefnum ef litið er fram hjá einstökum löndum. Nú hafi heimurinn vaknað og það hressilega. „Græna orkan og nauðsyn á nýtingu hennar er orðin mjög áberandi í alþjóðasamfélaginu. Þar með stöndum við Íslendingar með öðrum þekkingarþjóðum á þrepskildi nýrrar aldar - aldar hinna grænu umhverfisgilda," segir Sighvatur. 

Viðtalið við Sighvat