Menntamál og lýðheilsa mikilvægustu málaflokkar í héraðsþróunarsamstarfi

31.3.2011

Miklar breytingar

Enn er malavískum börnum kennt undir trjákrónum eins og efri myndin sýnir en á neðri myndinni sjáum við dæmi um nýbyggðan nútímalegan skóla, St. Augustin í Mangochi héraði, með á þriðja þúsund barna. Hann er byggður fyrir íslenskt þróunarfé.

Undirbúningur að auknu samstarfi við héraðsyfirvöld í Mangochi í Malaví er nú í fullum gangi að sögn Stefáns Jóns Hafstein umdæmisstjóra ÞSSÍ í Malaví . Tveir ráðgjafar halda samráðsfundi með heimamönnum þessa dagana, þær Margrét Einarsdóttir af aðalskrifstofu og Þuríður Árnadóttir læknir. „Þær standa fyrir vettvangsferðum, samráðsfundum og vinnustofum til að leiða fram sjónarmið helstu álitsgjafa vegna fyrirhugaðs hérðasþróunarsamstarfs á næstu árum,” segir Stefán Jón.

 „Margrét mun gera verkefnisáætlun fyrir samstarf  ÞSSÍ í héraðinu í heild, en Þuríður einbeita sér að heilsugeiranum sérstaklega. Samkvæmt verkáætlun sem verið hefur í mótun í Malaví allt frá 2008 mun Þróunarsamvinnustofun leggja lið í menntamálum og lýðheilsu, þar sem vatn og hreinlæti er snar þáttur í. Þessi verkáætlun felur í sér að form þróunaraðsamvinnu í Malaví verður á breiðari grunni en áður því einstök verkefni verða felld undir þróunaráætlun Mangochihéraðs í samvinnu við heimamenn. Þessi tilfærsla hófst í fyrra með því að héraðsstjórn tók við þáttum í fullorðinnafræðsluverkefni ÞSSÍ og nú í ár hefur lokaátak í vatnsverkefninu, sem hófst 2007, færst til héraðs,” segir hann. 

Að þessu sinni felst vinna Margrétar og Þuríðar í að útfæra nánar þær hugmyndir sem reifaðar hafa verið með heimamönnum og yfirvöldum á liðnum misserum.  Að sögn Stefáns Jóns er ætlunin að á síðari hluta ársins liggi fyrir fullbúin verkefnaskjöl og útfærðar framkvæmdaáætlanir í þeim málaflokkum sem mest er talin þörf á að aðstoða og vænlegast þykir fyrir Ísland að koma að.

Stefán Jón segir ánægjulegt hve héraðsstjórn sýni málinu mikinn áhuga, og reyndar miklu fleiri.  „Ráðuneyti sveitarstjórnarmála hafði mikið við þegar við undirrituðum minnisblað um þetta samstarf í lok síðasta árs og finnst greinilega áhugavert að stofnun eins og Þróunarsamvinnustofun skuli leita beint eftir þátttöku á héraðsgrunni.  Ég hef líka orðið var við að fleiri styrkjaríki fylgjast með þessari nálgun okkar - að mörgu leyti þykja héruðin vænleg til samstarfs, því þar brennur þörfin á mönnum. Við vinnum samkvæmt forgangsröðun héraðsmanna, en þetta samráðsferli hófst formlega í lok árs 2009 eftir nokkur samskipti á því ári. Í fyrra áttu sér svo stað fjölmargir samráðsfundir og nú má segja að þær Margrét og Þuríður hafi það verkefni að  útfæra nákvæmlega sem um hefur verið rætt og sett í stefnumótunarskjöl til þessa" segir Stefán Jón. Meðal þeirra sem taka þátt í þessu starfi eru starfsmenn héraðsstjórnar frá ýmsum skrifstofum, héraðshöfðingjar, þátttakendur úr nokkrum svæðaþróunarnefndum og forystumenn úr þorpum þar sem starfa þróunarnefndir.  „Eitt af því sem þarf að horfa á till framtíðar," segir Stefán Jón, „er einmitt hvernig við tryggjum að í okkar starfi komi viðhorf fram frá grasrótinni og skili sér upp til stjórnvalda, eins og allir eru sammála um að eigi að vera."