Heimsmeistaraliði Salaskóla í skólaskák boðið til Namibíu

10.9.2007

Heimsmeistarar til Namibíu

Skáksveit Salaskóla ásamt Sighvati Björgvinssyni framkvæmdastóra ÞSSÍ, Gunnari Birgissyni bæjarstjóra Kópavogs og fulltrúum Skáksambands Íslands og Hróksins, Davíð Ólafssyni og Kristian Guttesen.

Þróunarsamvinnustofnun Íslands og Kópavogsbær hafa ákveðið að bjóða heimsmeistaraliði Salaskóla í skólaskák, ásamt tveimur fararstjórum, til Namibíu. Ferðin hefst næstkomandi miðvikudag, 12. september.

Skáksveit Salaskóla í Kópavogi vann í sumar heimsmeistaratitil í flokki 14 ára og yngri á alþjóðlegu móti grunnskólaliða sem haldið var í Tékklandi. Í sigurliðinu voru Jóhanna Björg Jóhannsdóttir, Petrekur Maron Magnússon, Páll Andrason, Guðmundur Kristinn Lee og Birkir Karl Sigurðsson, öll á aldrinum 11-14 ára. Þessi hópur fer til Namibíu í vikunni ásamt þjálfurum og fararstjórum liðsins, Hrannari Baldurssyni og Tómasi Rasmus.

Þróunarsamvinnustofnun hefur í samstarfi við Skáksamband Íslands og Hrókinn staðið fyrir skákverkefni meðal grunnskólabarna í Namibíu síðustu þrjú árin ásamt því að styðja við bakið á namibíska skáksambandinu og þjálfa landslið Namibíu í skák. Skákverkefninu lýkur á næstunni og því þótti við hæfi að bjóða nýju heimsmeisturunum í skólaskák frá Salaskóla í heimsókn til Namibíu.

Í ferðinni gefst íslensku sveitinni kostur á því að tefla við aðra grunnskólanemendur og taka þátt í tveimur meistaramótum ungmenna í Namibíu. Annars vegar er um að ræða keppni skólaliða og hins vegar einstaklingskeppni en bæði mótin eru haldin í Eros grunnskólanum í höfuðborginni Windhoek.

Íslenska sveitin kemur til með að ferðast talsvert um Namibíu í ferðinni og meðal annars heimsækja skóla frumbyggja, San fólksins, í grennd við bæinn Grootfontein. Á þeim slóðum er einnig búgarður þar sem íslensku krakkarnir koma til með að komast í tæri við villt dýr í “safariferð”.

Ferðinni lýkur 21. september.