Íslensk sérþekking í jarðhitamálum til stuðnings stjórnvöldum í Níkaragva

11.12.2007

Jarðhiti

Geysilegur ónýttur jarðhiti er í Níkaragva en þjóðin býr við orkuskort og skömmtun á rafmagni.

“Óvissuástand í orkumálum er að mati stjórnvalda hér í Níkaragva einn helsti þrándur í götu allrar þróunar í landinu. Skömmtun á rafmagni er daglegt brauð en engu að síður eru möguleikar landsins til nýtingar jarðvarma geysilega miklir og við ætlum að leggja stjórnvöldum lið við að byggja upp mannauð til að nýta jarðvarmann,” segir Gísli Pálsson umdæmsstjóri Þróunarsamvinnustofnunar Íslands í Níkaragva.

Tekin hefur verið ákvörðun um að ráðast í fimm ára þróunarverkefni í Níkaragva til að styðja við þekkingu og þjálfun á vegum ráðuneyta orku- og umhverfismála. Vísindamenn frá Íslenskum orkurannsóknum (ÍSOR) munu að mestu leyti veita sérfræðiþekkinguna. Undirbúningur verkefnisins hefur staðið yfir frá árinu 2005. “Í upphaflegri beiðni stjórnvalda Níkargva um tvíhliða samvinnu við Íslands var sérstaklega horft til uppbyggingar og aukinnar nýtingar á jarðvarma í landinu,” segir Gísli. “Verkefnið samrýmist líka áherslum ríkisstjórnar Íslands um endurnýjanlega orkugjafa og veitingu þróunaraðstoðar á þeim sviðum þar sem Íslendingar búa yfir sérstakri reynslu og þekkingu.”

Gísli segir að orkuframleiðslan í Níkaragva sé að stórum hluta frá díselstöðvum með tilheyrandi útblæstri og kostnaði. Í raun megi segi að neyðarástand ríki í orkumálum í landinu því eftirspurnin eftir rafmagni sé svo mikil að beita þurfi skömmtun nánast daglega. “Skortur á sérfræðiþekkingu innan stjórnkerfis Níkaragva hefur hamlað því að landið nýti þann mikla jarðvarma sem hér er að finna. Stjórnvöld vilja auka hlutfall endurnýjanlegrar orku í orkubúskap landsins og telja brýnt að auka þekkinguna á þessu sviði. Við ætlum að leggja hönd á plóg við uppbyggingu mannauðs á þessu mikilvæga sviði,” segir Gísli.

Kostnaður við verkið í heild er metinn á rúmar fjórar milljónir Bandaríkjadala.