Formleg afhending hluta stjórnsýslubyggingar í Mukono héraði í Úganda

11.3.2008

Ágústa afhendir lyklana

Héraðsstjóri Mukono héraðs tekur við lyklum af nýju stjórnsýslubyggingunni úr hendi íslenska umdæmisstjórans í Úganda.

Mynd 1 af 3

« fyrri næsta »

1 2 3

Ágústa Gísladóttir umdæmisstjóri Þróunarsamvinnustofnunar Íslands í Úganda afhenti á dögunum við hátíðlega athöfn fullbúna fyrstu hæð í stjórnsýslubyggingu Mukono héraðs. Framlag Íslendinga til byggingarinnar er einn af mörgum verkþáttum fullorðinsfræðsluverkefnis ÞSSÍ í héraðinu en það nær til tveggja eyjaklasa á Viktoríuvatni.

Á fyrstu hæð stjórnsýslubyggingarinnar eru skrifstofur héraðsstjóra og félagsmáladeild hérðasins. Lilja Dóra Kolbeinsdóttir verkefnisstjóri fullorðinsfræðsluverkefna ÞSSÍ í Úganda segir að eitt af megin markmiðum verkefnisins í Mukono héraði sé að auka getu félagsþjónustunnar til að framkvæma áætlun um fullorðinsfræðslu í fiskimannasamfélögum á Buvuma og Koome eyjum. "Starfsmenn félagsmáladeildarinnar hafa hingað til unnið við mjög bágbornar aðstæður og úrbæturnar á starfsaðstöðunni eru því kærkomnar," segir Lilja Dóra. Hún bendir á að félagsþjónustudeildir í héruðum landsins séu ein af burðarstoðum stjórnvalda í aðgerðaáætlun um jafnréttismál og útrýmingu fátækar.

Við afhendingu á nýja húsnæðinu fékk Þróunarsamvinnustofnun og íslenska þjóðin þakkarskjöld frá héraðsstjórninni og íbúum Buvuma og Koome eyja í Viktoríuvatni. Íbúar á eyjaklösunum tveimur eru um fimmtíu og fimm þúsund og frá árinu 2005 hafa rúmlega tíu þúsund þeirra sótt fullorðinsfræðslu. Íbúar héraðsins alls eru hins vegar um 900 þúsund talsins.