Fimm starfsnemar á leið til þróunarlanda

20.5.2008

Starfsnemar 2008

Starfsnemarnir fimm, t.f.v. Þóra Bjarnadóttir (Níkaragva), Katrín Magnúsdóttir (Namibía), Guðrún Birna Jóhannsdóttir (Úganda), Ásdís Bjarnadóttir (Malaví) og Nanna Rún Ásgeirsdóttir (Mósambík),

Fimm starfsnemar halda á næstunni til fimm mánaða dvalar í samstarfslöndum Íslendinga í þróunarsamvinnu. Þeir voru ráðnir úr hópi rúmlega 150 umsækjenda um stöðurnar en Þróunarsamvinnustofnun Íslands hefur frá árinu 2004 ráðið starfsnema til starfa í samstarfslöndunum.

Á þessu fimm mánaða tímabili, frá júlí til desember, fá starfsnemarnir tækifæri til að kynnast starfsemi Þróunarsamvinnustofnunar á vettvangi, meðal annars gagnaöflun, undirbúningi og framkvæmd verkefna og fá þannig hagnýta leiðsögn og þjálfun við aðstæður í þróunarríkjunum.

Háskólanemarnir sem valdir voru til starfa að þessu sinni eru Þóra Bjarnadóttir, MA nemi í þróunarfræði, sem fer til Níkaragva, Ásdís Bjarnadóttir, MSc í þróunarfræðum, heldur til Malaví, Nanna Rún Ásgeirsdóttir, MA nemi í alþjóðasamskiptum, verður í Mósambík, Guðrún Birna Jóhannsdóttir, MA nemi í þróunarfræðum og alþjóðasamskiptum, fer til Úganda og Katrín Magnúsdóttir, MA nemi í mannfræði, verður í Namibíu.

Ekki var auglýst staða starfsnema á Srí Lanka fremur en á síðasta ári vegna átakanna í landinu.