Íslenska verkefnið getur rutt brautina fyrir áþekk verkefni að mati ráðherra

19.2.2009

Ráðherraheimsókn

Malavíski ráðherrann ásamt ráðuneytisstjóra og starfsfólki ÞSSÍ við borholu sem verkefnið setti nýverið upp í Yuda þorpi á Nankumbaskaga. Ljósmynd: Mcneil Kalowekamo.

Mynd 1 af 2

« fyrri næsta »

1 2

Sidik Mia ráðherra vatnsmála í Malaví telur að íslenska vatns- og hreinlætisverkefnið í Mangochihéraði geti rutt brautina fyrir áþekk verkefni á öðrum svæðum í framtíðinni. Ráðherrann kynnti sér á dögunum áhrif verkefnisins á daglegt líf íbúa og ræddi við starfsmenn til að kanna framvindu mála. Greint var frá heimsókn ráðherrans og fylgdarliðs hans í öðru tveggja stærstu dagblaða Malaví.

Þróunarsamvinnustofnun stýrir í samvinnu við malavísk stjórnvöld vatns- og hreinlætisverkefni á Nankumbaskaganum við Malavívatn í Mangochi héraði. Að sögn Glúms Baldvinssonar verkefnisstjóra er höfuðmarkmið verkefnisins að veita íbúum aðgengi að neysluhæfu vatni og bættri hreinlætisaðstöðu til að koma í veg fyrir útbreiðslu vatnstengdra sjúkdóma eins og kóleru. “Kólerufaraldrar hafa verið tíðir á svæðinu á síðustu árum með þeim afleiðingum að tugir þúsunda íbúa hafa smitast og hundruð týnt lífi,” segir Glúmur.

Íbúar á Nankumbaskaga eru um 110 þúsund og Glúmur segir stefnt að því að sem flestir þeirra hafi aðgang að vatnsbólum með neysluhæfu vatni og bættri hreinlætisaðstöðu fyrir árslok 2010.