Sendiráði Íslands í Managua lokað 1. ágúst
Samuel Santos utanríkisráðherra Níkaragva og Sighvatur Björgvinsson framkvæmdastjóri Þróunarsamvinnustofnunar Íslands áttu fund í Managua á þriðjudag vegna þeirrar ákvörðunar íslenskra stjórnvalda að loka sendiráði Íslands í landinu sem jafnframt er umdæmisskrifstofa Þróunarsamvinnustofnunar Íslands. Auk þeirra sátu fundinn Valdrack Jaentschke aðstoðarutanríkisráðherra þróunarmála, Roberto Leal framkvæmdastjóri skrifstofu Evrópumála, Geir Oddsson umdæmissstjóri ÞSSÍ í Níkaragva og Gerður Gestsdóttir verkefnastjóri félagslegra verkefna.
Í lok fundarins var birt eftirfarandi sameiginleg yfirlýsing:
Utanríkisráðuneyti ríkisstjórnar sátta og þjóðareiningar og sendiráð Íslands í Níkaragva gera heyrin kunnugt að vegna þeirra áhrifa sem alþjóðlega fjármálakreppan hefur haft á efnahag Íslands hefur ríkisstjórn Íslands ákveðið að loka sendiráði sínu í Managua frá og með 1. ágúst 2009.
Ríkisstjórn Íslands mun standa við allar skuldbindingar sínar gagnvart Níkaragva í samræmi við rammasamkomulag milli ríkisstjórnar Íslands og ríkisstjórnar Níkaragva sem undirritað var í Managua 26. júní 2006 og staðfest af þinginu 2007.
Þróunarsamvinna Níkaragva og Íslands styrktist árið 2008 þegar fyrsti samráðsfundur landana var haldinn. Aðstoð Íslands hefur verið í geirum orku, menntunar og heilbrigðismála.
Níkaragska þjóðin og ríkisstjórn hennar þakkar vinaþjóð sinni á Íslandi fyrir þá samstöðu sem hún hefur sýnt á þessum árum, sem við munum halda áfram að þróa í diplómatískum samskiptum okkar, bæði tvíhliða og marghliða. Á sama tíma óskum við þess að sem fyrst finnist lausn á þeim efnahagslegu vandamálum sem þessi vinaþjóð stendur frammi fyrir og óskum þess að í nálægri framtíð getum við aftur notið stuðnings og samvinnu við Ísland.
Managua, 24. mars 2009.
Frétt dagblaðsins El Nuevo Diario í Níkaragva í morgun
125 Reykjavík Heimilisfang: Þverholt 14 Sími: 545 8980 Bréfasími: 545 8985 Netfang: iceida@iceida.is