Félagsleg staða fátækra kvenna og barna bætt

Nýr samningur til fjögurra ára

25.10.2004

Enskukennsla fyrir fullorðna

Enskukennsla fyrir fullorðna í Mósambík.

Nýr rammasamningur til fjögurra ára hefur verið undirritaður á milli Þróunarsamvinnustofnunar Íslands (ÞSSÍ) og ráðuneytis kvenna-og félagsmála í Mósambík. Samningurinn miðar að því að styrkja enn frekar það samstarf sem ÞSSÍ og ráðuneytið hafa verið að móta undanfarin ár, en sú vinna hefur einkum falist í því að styrkja innri uppbyggingu í ráðuneytinu sem og bæta félagslega stöðu fátækra kvenna og barna, auk þess að efla jafnréttisvitund með markvissu fræðslu- og uppbyggingarstarfi.

Samningurinn var undirritaður í Mapútó, höfuðborg Mósambík, nýverið. Sighvatur Björgvinsson, framkvæmdastjóri ÞSSÍ, skrifaði undir hann fyrir hönd Íslands, en Virgilía dos Santos Matabele, ráðherra, af hálfu Mósambík.

Frá undirritun samnings ÞSSÍ og
ráðuneyti kvenna- og félagsmála í
Mósambík.

Í samstarfi við kvenna- og félagsmálaráðuneytið í Mósambík hefur ÞSSÍ stutt ýmis félagsleg verkefni í Mapútó og nærliggjandi héruðum, auk þess sem íslenskur ráðgjafi er starfandi í ráðuneytinu og er leiðbeinandi um uppbyggingu verkefna. Félagslegu verkefnin eru flest smá í sniðum en hafa skilað mjög góðum árangri. Hundruð fátækra kvenna, einkum ekkjur og einstæðar mæður, hafa stundað námskeið í lestri, skrift og saumaskap, fengið leiðsögn í ræktun matjurta og fræðslu um heilbrigðismál og forvarnir vegna HIV smits. Þátttaka kvennanna í hinum ýmsu verkefnum hefur sýnilega bætt lífskjör þeirra sjálfra og fjölskyldna þeirra og gefið þeim möguleika til að auka tekjur sínar.