Stuðningur við fullorðinsfræðsluverkefni í Mangochi héraði - verkefninu lauk á árinu 2010

SKOÐA MYNDASYRPU

Heiti verkefnis – svið:

Stuðningur við fullorðinsfræðsluverkefni malavískra stjórnvalda í Traditional Authority Nankumba 2006-2010 – Support to the National Adult Literacy Programme in Traditional Authority Nankumba 2006-2010.

Samningur og samstarfsaðilar:

Verkefnið er til fimm ára og er framhald á stuðningi við fullorðinsfræðsluverkefni malavískra stjórnvalda á Monkey Bay svæðinu sem hófst árið 2001. Samstarfsaðilar ÞSSÍ í verkefninu er kvennamálaráðuneytið (Ministry of Women and Child Development) auk héraðsyfirvalda í Mangochi sýslu en Traditional Authority Nankumba er hluti hennar.

Lýsing og markmið:

Leiðarljós verkefnisins er að aðstoða malavísk yfirvöld við að ná þúsaldarmarkmiðunum um þróun og við að ná eigin markmiðum um efnahagslegan vöxt og þróun. Framlag verkefnisins til þessa er að styrkja fullorðinsfræðslu í Traditional Authority Nankumba og stuðla með því að auknu læsi meðal almennings. Í ljósi þeirra tengsla sem eru milli ólæsis og fátæktar notar verkefnið REFLECT aðferðafræðina við fullorðinsfræðslu í því skyni að tengja lestrarnámið staðbundinni þróun og frumkvæðisrétti þátttakenda.

Til að ná fram yfirmarkmiðum verkefnisins hafa verið skilgreind sértæk markmið sem unnið er að í áföngum þau fimm ár sem verkefnið varir. Þessi sértæku markmið eru að:

• Stuðla að frumkvæðisrétti og velsæld í Traditional Authority Nankumba með því að bjóða uppá lestrar- og lífsleikniþjálfun fyrir ólæsa þorpsbúa á svæðinu, og með því að byggja upp getu til þróunar innan þorpanna.
• Stuðla að uppbyggingu og viðhaldi þekkingar starfsmanna og sjálfboðaliða ráðuneytis með því að bjóða reglubundna þjálfun sem og skólastyrki til valinna starfsmanna til framhaldsmennturnar á sviði fullorðinsfræðslu og þróunarfræða.
• Styðja uppbyggingu grunnvirkja sem stuðla að skilvirkri og árangursríkri fullorðinsfræðslu í Mangochi héraði.
• Aðstoða við eflingu grunnvirkja innan þorpanna.
• Stuðla að tengslamyndun og samstarfi milli hagsmunaaðila í fullorðinsfræðslu og þróunarstarfi innan Mangochi sýslu og einkum innan Traditional Authority Nankumba.
• Bæta aðgengi þorpa innan Traditional Authority Nankumba að ýmiss konar þjónustu og fjármögnunarleiðum.

Framvinda - úr ársskýrslu 2010:

ÞSSÍ styrkti áfram yfir níutíu leshringi þar sem á annað þúsund manns nutu  lestrar- og annarrar fullorðinnafræðslu. Á árunum 2006-2010 nutu nær 2200 manns leiðsagnar í leshringjunum og var heildarframlag ÞSSÍ til þess nær 2.7 milljónir dollara og er þá félagsmiðstöð í Monkey Bay meðtalin, en kostnaður við hana nam um 500 þúsund Bandaríkjadölum.

Fræðsla fór einnig fram um margt sem varðar lífsleikni, svo sem um alnæmi og  aðra sjúkdóma. Gestafyrirlesarar sáu um slíkt, auk þess sem leikhópar, útvarpsþættir og blaðefni var notað til fræðslu. Einfalt lesefni var gefið út, sumt af því  skrifað af nemendum í verkefninu. Á vegum verkefnisins voru líka studd smá- verkefni á vegum leshringja í heimaþorpum til að bæta afkomu eða virkja heimamenn til verkefna eins og að byggja skólastofur, kennarahús eða álíka.

Um miðbik ársins færðist umsjá þessa verkefnis til héraðsstjórnar í Mangochi með fjárstyrk frá ÞSSÍ. Verkefninu lauk svo formlega í árslok 2010 og verkefnisstjóri Íslands, Jo Tore Berg hvarf á braut. Hins vegar styrkir ÞSSÍ áfram fullorð-innafræðslu á vegum héraðs árið 2011 svo verkefnið mun á þeim tíma lagast að malavísku skipulagi á hérðasvelli. Fullorðinnafræðsla færðist á árinu milli ráðuneyta í Malaví og heyrir nú undir menntamálaráðuneytið.

Hluti af þessu verkefni var bygging félagsmiðstöðvar í Monkey Bay þar sem ætlunin er að hafa margs konar félagsstarfsemi og þjálfun, auk þess sem héraðsþróunarstarfsmenn (Community Development Assistants) hafa þar að-stöðu. Sex slíkir störfuðu í tengslum við verkefni ÞSSÍ auk yfirmanns á héraðsskrifstofu í Mangochi. Þjóðarbókasafnið (National Library) opnaði útibú í miðstöðinni og voru það sannkölluð menningartímamót í Monkey Bay. Nokkur námskeið voru haldin á félagsmiðstöðinni þar sem fólki var kennd matreiðsla, matjurtarækt, brauðbakstur og fleira. Miðstöðin er vel búin tækjum og  öðru sem til þarf og verður afhent ráðuneyti sem fer með málefni kvenna og velferðarmála árið 2011.