Lagt til að fjárframlög til þróunarsamvinnu verði skert um tæpar 1700 milljónir

13.11.2008

Niðurskurður um 777 milljónir hjá ÞSSÍ

Framlög til þróunarmála minnka verulega en engu að síður verður staðið við skuldbindingar við þróunarlönd sem þegar hafa verið gerðar. Myndin er frá Malaví. Ljósmynd: Gunnar Salvarsson.

Samkvæmt hagræðingartillögum utanríkisráðuneytis verða framlög til þróunarsamvinnu skert um 1666 milljónir króna á næsta ári sem er rúmlega 32% niðurskurður frá fjárlagafrumvarpi ársins 2009. Af þessari upphæð verða framlög til Þróunarsamvinnustofnunar Íslands lækkuð um 777 milljónir króna frá því sem fjárlagafrumvarpið gerir ráð fyrir.

Á fundi Ingibjargar Sólrúnar Gísladóttur utanríkisráðherra með fréttamönnum kom fram að áformað var að opinber þróunaraðstoð Íslendinga yrði 0,35% af vergum þjóðartekjum á árinu 2009 en hún fer niður í 0,24% gangi tillögurnar eftir. Af fjórum sendiskrifstofum sem lokað verður á næsta ári er ein umdæmisskrifstofa Þróunarsamvinnustofnunar, í Kolombo á Srí Lanka. Fyrirhugað er að hætta starfseminni þar um mitt næsta ár þegar öllum verkefnaskuldbindingum er lokið.

Tillögur til sparnaðar í úttgjöldum Þróunarsamvinnustofnunar fela í sér að engar nýjar skuldbindingar verða gerðar á næsta ári en hins vegar verður staðið við allar skuldbindingar í samstarfslöndum sem þegar hefur verið skrifað undir.